🌹❤️ খ্যাতিসম্পন্ন অনুবাদক কবিতা দত্ত গোস্বামীৰ কেইবাখনো গ্রন্থই ইতিমধ্যে পঢ়ুৱৈৰ মাজত ব্যাপক জনপ্রিয়তা অৰ্জন কৰিছে।🌹❤️
আমেৰিকা নিবাসী কিষান উপাধ্যায়ৰ ইংৰাজী গ্ৰন্থ The Last Orange অসমীয়া অনুবাদ ‘অন্তিম সুমথিৰা’ তেওঁৰ এখন বহুচৰ্চিত গ্ৰন্থ।
ড° ভৱেন্দ্ৰনাথ শইকীয়াৰ ‘স্বর্ণকমল পুৰস্কাৰ’ লাভ কৰা চলচিত্র ‘অগ্নিস্নান’ত এটি গুৰুত্বপূৰ্ণ চৰিত্ৰত অভিনয় কৰা শ্ৰীমতী গোস্বামীয়ে টিভিৰ ধাৰাবাহিক আৰু মঞ্চতো অভিনয় কৰিছিল।
তেওঁ অসমৰ জনপ্ৰিয় টিভি চেনেল ‘ৰংৰ বাবে কেইবাখনো ধাৰাবাহিকৰ কাহিনী আৰু চিত্ৰনাট্য লিখি জনপ্রিয়তা অর্জন কৰে।
ইয়াৰ ভিতৰত ‘অনুৰাগ তোমাৰ বাবে’, ‘উমাল বুকুৰ হেজাৰ কাহিনী”, “পিতা পুত্ৰ’ আদি উল্লেখযোগ্য।
তদুপৰি তেওঁ শিশু সকলৰ বাবে গল্প, নাটকো ৰচনা কৰি আহিছে।
অসমীয়া, ইংৰাজী আৰু হিন্দী ভাষাৰ লগতে ওড়িয়া ভাষাতো তেওঁৰ বিশেষ ব্যুৎপত্তি আছে।
ওড়িয়া ভাষাৰ কেইবাজনো খ্যাতি সম্পন্ন লেখকৰ অনেক কেইখন গ্রন্থ অনুবাদ কৰা গোস্বামীৰ শেহতীয়া অনুদিত গ্রন্থ ড° প্ৰতিভা ৰায়ৰ ভ্ৰমণ কাহিনী ‘স্বপ্নৰ আলাস্কা’।
উল্লেখযোগ্য যে, তেওঁ অনুবাদৰ ক্ষেত্ৰত কেইবাটাও ৰাষ্ট্ৰীয় বঁটা পাবলৈ সক্ষম হৈছে।
